پيپلز پارٽي جي ايم پي اي پير سيد محمد بچل شاهه چيو آهي ته موجوده حڪومت پاران ملڪ توڙي صوبي ۾ رڪارڊ ترقياتي ڪم ڪرايا آهن جڏهن ته راندين کي هٿي وٺرائڻ لاءِ مختلف قدم کنيا پيا وڃن هن اهڙو اظهار خيرپور ڀرسان ڳوٺ مبارڪ علي ورڪ ۾ راندين جي صوبائي سيڪريٽري شعيب احمد صديقي جي خاص هدايتن تي سنڌ اسپورٽس بورڊ پاران شهيد بينظير ڀٽو ڪوڏي ڪوڏي ٽورنامينٽ ۾ انعامن ورهائڻ واري تقريب کي مهمان خاص جي حيثيت ۾ خطاب ڪندي ڪيو. ايم پي اي پير محمد بچل شاهه چيو ته پيپلز پارٽي جي حڪومت عوام جي ڀلائي ۽ بهتري لاءِ مختلف ڪوششون وٺي رهي آهي جڏهن ته تعليم ، صحت ۽ روزگار لاءِ بهتر قدم کڻي عوام جي خدمت ڪري رهي آهي. هن وڌيڪ چيو ته سنڌ حڪومت جي راندين واري شعبي پاران سنڌ جي ثقافتي رانديون ملاکڙو، ڪوڏي ڪوڏي (ڪٻڊي) ، ونجهه وٽي سميت ڪرڪيٽ ۽ ٻين رانديون منعقد ڪرائي عوام کي تفريح جا موقعا فراهم ڪيا پيا وڃن. ان موقعي تي ڊي او اسپورٽس مير محمد ڪلهوڙو ، انچارج ڊپٽي ڊائريڪٽر انفارميشن خيرپور صاحب خان ڀنڊ، ايڊوڪيٽ حفيظ الله چانڊيو، اعجاز جکڙ ٻين مهمانن ڪوڏي ڪوڏي راند جي مقابلن جي انعامن ورهائڻ واري تقريب ۾ شرڪت ڪئي. جڏهن ته راند ۾ ضلعي جي چئن مختلف ٽيمن حصو ورتو ۽ فائنل مقابلو سوڀوديرو ۽ خيرپور جي ٽيمن وچ ۾ ٿيو جنهن ۾ سخت مقابلي کانپوءِ خيرپور جي ٽيم راند کٽي ورتي. ان موقعي تي انعامن ورهائڻ واري تقريب ۾ خطاب کانپوءِ ايم پي اي پير سيد محمد بچل شاهه فاتح ٽيم کي سنڌ حڪومت جي راندين واري کاتي پاران ونر ڪپ ٽرافي ۽ 15 هزار روڪ رقم ۽ هارائيندڙ ٽيم کي رنر ڪپ ٽرافي ۽ 10 هزار روڪ رقم جا انعام ڏنا. علائقي جي مختلف شعبن سان واسطو رکندڙ سوين ماڻهن شهيد بينظير ڀٽو ڪوڏي ڪوڏي ٽورنامينٽ جي مختلف مقابلن مان لطف اندوز ٿيا ـ

ڊپٽي ڪمشنر خيرپور محمد عباس بلوچ ٽنڊو مستي لڳ پير عبدالقادر شاهه جيلاني جي سالياني ميلي جو مزار تي چادر چاڙهي افتتاح ڪيو. ان موقعي تي ڊي سي خيرپور درگاهه تي ٿيل ترقياتي ڪمن جو پڻ معائنو ڪيو ۽ وڌيڪ ترقياتي ڪم ڪرائڻ جي لاءِ بلڊنگ کاتي جي لاڳاپيل عملدارن کي هدايت ڪئي. ميلي جي افتتاح کانپوءِ ڊي سي خيرپور محمد عباس بلوچ صوفياڻي محفل ۾ پڻ شرڪت ڪئي جڏهن ڊي سي خيرپور سان پيپلز پارٽي سنڌ ڪائونسل جو ميمبر لعل بخش منگي، شمشاد خان مري، فهيم منگي، ضلعي اطلاعات آفيسر صاحب خان ڀنڊ ٻيا پڻ ساڻس گڏ هئا. ٽنڊو مستي لڳ پير عبدالقادر شاهه جيلاني جي ميلو ٽي ڏينهن جاري رهندو جنهن ۾ ملاکڙو، ڪوڏي ڪوڏي جا مقابلا ۽ صوفياڻي ڪلام جون محفلون پڻ منعقد ڪيون وينديون. ان کان اڳ ڊي سي خيرپور محمد عباس بلوچ جيلاني پمپنگ اسٽيشن جو پڻ معائنو ڪيو ۽ ان موقعي تي اسڪارپ ، آبپاشي کاتي جي لڳاپيل عملدارن کي علائقي ۾ سم ۽ ڪلر کي ختم ڪرڻ جي لاءِ جوڳا بندو بست ڪرڻ جون هدايتون جاري ڪيون ـ

سيڪريٽري ڊسٽرڪٽ ريجنل ٽرانسپورٽ اٿارٽي خيرپور ڄاڻايو آهي ته ايڊيشنل ڊپٽي ڪمشنر ٽو خيرپور فيبروري 08 بروز اربع تي منجهند 12 وڳين ڊي سي آفيس خيرپور جي درٻار هال ۾ شهيد ذوالفقار علي ڀٽو ماڊرن بس ٽرمينل خيرپور جي حوالي سان ضلعي جي مختلف ٽرانسپورٽرس سان هڪ گڏجاڻي ڪندو ـ